بازگشت
د طالبانو امارت یا د پيریانو پاچايي
سرلوڅ مرادزی سرلوڅ مرادزی

په ۹۰ ومو کلونو کې کله چې طالبان پر هیواد واکمن شول ، ای ایس ای او د طالبانوعقیدوي ملګرو به ګونګوسي خپرول ، طالبان چې دومره په بېړه د هیواد یوه او بله سیمه نیسي ، هغوی سره ملایکې ملګرې دي . د جګړې په لومړۍ لیکه ملایکې جنګیږي . لومړی سیمه ملایکې نیسي او روسته يي طالبانو ته پریږدي . ځینو به لا دا هم ویل چې طالبان نه دي دیوان دي .غټ غټ او تنومن دي . هیڅوک ورته د مقابلي او ټینګي نه دي . طالبانو سره پيریان او نااشنا موجودات ملګري دي چې دوښمن يي نه ویني . د دوښمن لښکرې يي مخکې نسوار هم نه دي .

ریښتیا هم د طالبانو مشر ملاعمر نږدې شپږکاله پر هېواد د امارت پنوم واکمني وچلوله ، خو نوموړی هیچا ونه لید . په رسنیو کې څرګند نشو . خبریالانو سره يي ښکاره مرکه ونکړه او په رسنیو کې يي چا د عکس د خپرولو زړه ونکړ .

اوس هم د طالبانو سیوری پر ټولنه لویدلی . ځیني په دې اند دي چې طالبان د ژغورنګ پریښتې دي !   

 خوځينې بیا دا وايي : طالب او شيطان د یوې سکې دوه مخونه دي . طالب او ملا پخوا هم پرنورو ولسونواو تيرو نسلونو باندې په خپله بدله بڼه  يانې د شیطانانو ، دېوانو ، پېريانو ، جادوګرو او کوډګرو په بڼه  واکمني کړې او دا وار په خپله اصلي بڼه یانې د ملا او طالب په بڼه زمونږ پر خلکو نازل شوی دی .طالب او ملا ( ۱ ) په نړۍ کې د شیطانانو ، پېريانو، ديوانو ، جادوګرو او کوډګرو لومړنی استاد او پر يوه ولس د رنځونو ، کړاوونو ، بلاګانو او اپتونو د نازلولواو په کوډو او طلسمونو کې دهغو د ښکېلولو د دندې لپاره ځمکې ته رااستول شوی دی.

دوی طالب او ملا هغه تور ښامار بولي چې زمونږ له وطنه تاوراتاو او پر ولس مو کوړۍ کوړۍ پروت دی ، هر څه چې ويني ځان ته يی په اسويلي سره راکاږي او تر خپلې خېټې يی ځاروي .

څوک دا هم وايی :

د طالب پاچايي د اسماني کاڼو ، تندرونو ، جکړونو ، ګرد بادونو ، زلزلو ، توپانونو ، خوړونو او اتش فشانونو ټولګه ده چې د خلکو کورونه ، شتمنۍ او ژوند جاروکوي ، نړوي يي او له بېخه يي چپه کوي.

 د طالب واکمني ټولنې ته د نري رنځ ، وبا ، طاعون او نورو عالمګيرو ناروغيو په بيه تماميږي.

 طالب واکمني په ځنګله ګې د ځناورو واکمنۍ ته ورته ده . واکمن قانون په دواړو ګې زور دی . طالبان لکه لړمان ، ماران ، لېوان ، شغالان او پړانګان زمونږ د خلکو په برخليک حاکم دي ، هر وخت هغوی پر نېښ وهي ، داړي او څيروي يي .

خو ځيني په دې عقيده دي او وايي چې د طالب پاچايي زمونږ په وطن کې د نوح توپان دی ، هر څه او هر څوک تر اوبو لاندې کوی . زيروح او بې روح  یو شان له منځه وړي او د پخواني ژوند ټول اثار د نيستۍ کندې ته ورټيل وهي .

د طالب واکمني يعنې د ژونديو انسانانو هدېره ، دلته به خلک په تن ژوندي خو له ټولو به سا په ژوند ختلې وي . د هيچا پر شونډو به مسکا او پر وچولي خندا نه ليدل کيږی ، ولس به ټول په وير او ساندو اخته وي او وطن به ټول جنازه – جناره وي !

نور بيا وايی :

کوم قوم ته چې خدای په قار شی نو طالب پري واکمن کړي ، د طالب واکمني د يوه قوم د روسته والی لويه نښه ده . طالب د تورتم ، جهل ، بې سوادۍ ، ناپوهۍ ، کرکې او نفرت استازی ؛ د سمتي ، قومي ، ژبني او نژادي توپير او دښمنۍ ستر واعظ دی .

 طالب او مجاهد د ولسونو د عزت ، ناموس او پت پلورونکی او د هغو د تاريخ ، موزيمونو ، ارشيف ، تاريخي اثارو او ملي شتمنيو غل ، لوټمار او ستر کباړ دی .

د طالب پاچايي د پرديو استخباراتو ځاله ده او طالب ددې استخباراتو د لاس اله ده . طالب د پرديو لپاره د خپل ولس او وطن شيطاني او جاسوسي کوي . د بيلا- بيلو هېوادو د جاسوسۍ له مرکزونو څخه پيسي او وسلې اخلي او په دې ډول د خپل ولس د غلامولو ، سپکولو او خرڅولو دروند تاريخي مسوليت پر غاړه لري .

دوی د ماشومانو ، نجونو او ښځو په تښتولو ، خرڅولو او ځورولو تورن او لاسونه يي د بېګنا او معصومو انسانانو په وينو ککړ دي .

خو ډېری خلک بيا دا وايی چې طالب  د چنګېز ، ګوډ تيمور ، هلاکو ، هتلر ، انګرېز ، روس او نورو تور مخونه ورسپين او هغوی يي تبريه کړل او د تېر تاريخ او بشريت په کچه ،  په وحشت او بربریت کې تر ټولو واوښت .

که څه هم دوی هر يو په خپل وار سره رښتيا وايي او دا ټولې خبرې په خپل ځای کې سمې دي ، خو د طالب او مجاهد د جنايتونو په باب ، دا هر څه کم او ناڅيز دي او له سمندر څخه يوازې د څو څاڅکو په اندازه دي !

زه وايم :

که د نړۍ سيندونه او سمندرونه د ليکلو رنګ شي ،

د دنيا ځنګلونه ، ونې او بوټې قلمونه شي ،

د بشريت تېر شوي او اوسني نسلونه کاتبان شي

او زمونږ په وطن ( افغانستان ) کې

د طالب او مجاهد په لاس ترسره شوي جنايتونه وليکي

بيا به هم دا ليست نيمګړی وي

او د دوی د جنايتونو عشر

به هم نه وي بيان شوی !!!

یادونه :

( ۱ ) دلته له طالبه او ملا څخه موخه هيوادپال ملایان او طالبان نه دي بلکې سیاسي او د پردیو نوکران دي 

 


September 3rd, 2010


  برداشت و بازنویسی درونمایه این تارنما در جاهای دیگر آزاد است. خواهشمندم، خاستگاه را یادآوری نمایید.
 
بازگشت
گزیده مقالات